كلام بنات

السبت، أبريل 01، 2006

دبلة الخطوبة

العادة جرت ان لما الواحد بيتخطب، بيلبس دبلة، و اللى ما بينفذش العادة دى يبقى فيه حاجة غلط .. دة اللى حصل معايا.
قامت الدنيا علية إنى إزاى و إزاى مخطوبة و مش لابسة دبلة، و لما أبرر و أوضح إنها مش حاجة مهمة بالنسبة لينا، و انها مش فارقة معايا ألبسها بعد الجواز حتى، بقيت مجنونة و انسانة عجيبة، و بنات كتير تقولى: الدبلة هية اهم حاجة فى الخطوبة!

انا ليه لازم اعمل حاجة علشان المجتمع قاللى لازم أعمل كدة!
دى حاجة مش مقنعة، على عينى و راسى انها بتبقى علامة على إنى محجوزة (معلش فى الكلمة، بس هية اتقالتلى كدة، كأنى مثلاً الترابيزة اللى الزبون حجزها!)، بس ما تقنعنيش ان الدبلة هية اللى هتزود أواصر الود و المحبة مثلاً.

مش قادرة أفهم فكرة إن حتة حديد (فضة دهب ألماظ، هية آخرها حتة حديد)، هية اللى هتزود العلاقة أو الرباط ما بين اتنين، يعنى احنا كدة بنوصل علاقاتنا الجميلة فى الآخر لحاجات مادية.

يا بنات، إيه أهمية الدبلة بالنسبة لكم؟ و هل لازم تلبسوها حتى لو انتم مش مقتنعين بها؟

47 تعليقات:

  • انا بالنسبة لى الدبلة مهمة جدا ..مش مسالة انها تزود الحب ..بس بتحسسنى انه معاي دايما ..اسمه منقوش عليها ..محتاجين نحس بده على المستوى المادي مش على المستوي الروحي بس ..بس طالما انت مبسوطة كده ميهمكيش..لكن انا عن نفسي الدبله بتمثلي حاجات كتير

    حسب Blogger radwa osama, في 1/4/06 10:58 م  

  • أنا كان عندي نفس الفكرة
    بس لبست دبلة لانها بتمثل لرضوي ( اللي علقت قبلي ) حاجات كتير

    تحتاج لان تتجاوز التقاليد الي
    - قناعة قوية بالجديد او البديل
    - ازدراء كاف او لا مبالاة بالقديم
    - قوة الاختلاف و تحمل التبعات
    - اذا كانت شيئا جماعيا تحتاج لمن يشاركك كل ما سبق

    حسب Blogger عمرو عزت, في 1/4/06 11:04 م  

  • عندك حق يا إيمان و ياريت تتمسكي بيه و متخليش الضغوط دي تأثر عليكي..أنا مجوزة
    أهه و مش لابسة دبلة

    في الأول كنت باسمع نفس الكلام: "طب و ازاي الناس تعرف إنك مجوزة؟؟"
    كنت بقولهم اللي يعرفني عارف إني مجوزة، و اللي مايعرفنيش مش المفروض تفرق معاه في حاجة

    شوية و بطلت أسمع الكلمتين الحلوين دول

    رضوى:
    تفرق في حاجة لو كان اسمه منقوش على خاتم أو دلاية ؟؟ ليه لازم الدبلة؟؟

    حسب Anonymous Manal, في 2/4/06 12:02 ص  

  • مش بس مهمة , اعرف ناس بتعتبر خلعها (لاي سبب( نذير سوء
    و كأن روح العلاقة كلها معلقة في الدبلة

    مش مهم بتمثل ايه للمجتمع يا ايمان ,لامهم بتمثلك انت ايه

    لو حاسة انك مش عايزة او مش مهتمة تلبسيها ماتلبسيهاش حتى لو المجتمع شايفها "اهم حاجة في الخطوبة"

    ربنا يوفقك يا ايمان

    حسب Blogger bluerose, في 2/4/06 12:05 ص  

  • منال: لا ما تفرقش ..تصدقي انها لو دلاية تبقي اقوى يعني جنب القلب..بس ولو دبله برضه بتكون فى الشريان اللي بيوصل للقلب ..بحب البسها يمكن عندي عقده ان كل الناس تعرف اني مخطوبة او متجوزة بعد كده ..جايز هفكر فيها

    حسب Blogger radwa osama, في 2/4/06 12:17 م  

  • بصي بصراحه بتفرق بالنسبه ليه كتير و مهمه جدا زي ما رضوى قالت حاجه منه و معايا علطول واسمه عليها بتحسسني انه معايه طول الوقت و مبحبش اخلعها ابدا بحس هو ده مكانها الطبيعي وبحبها قوي

    بس طالما انت مش حباها خلاص متلبسيهاش عشان الناس و اعملي اللي يريحك انت

    حسب Blogger bosbos, في 2/4/06 12:21 م  

  • الدبلة بيبقي ليها فرحتها...كنت زمان ممكن اقول لازم دبلة في الخطوبة و حركات لذيذة و كدة..بس دلوقتي الدبلة بعد الجواز..
    ملاحظة: منكرش اني استغربت انك مش لابسة دبلة بعد الخطوبة علي طول.."فاكرة لما سألتك"..بس اقتنعت بكلامك..لأنه فعلا..الموضوع اكبر من حتة الحديد

    حسب Blogger Nerro, في 2/4/06 12:30 م  

  • ممكن أجاوب بصفتي حديثة عهد؟ :)
    الحقيقة أنا ضد فكرة الامتلاك بعنف.. وموضوع الدبلة بالنسبة لي قبل الخطوبة كان يشبه ل: إيه ده كأنه بيكتب اسمه عليها
    وأنا أرفض وأشجب وأعترض وكده

    لكن دلوقت حسيت بفائدة الدبلة في تحديد علاقتي مع الآخرين.. زي ما تقولي كده بتقى نوع من أنواع الفرامل اليدوية!
    بتوقف الناس اللي عندها عشم عند حدها من غير ما الواحد يضطر يتكلم ولا يحرج حد..
    حاجة كده زي خواتم ال
    power rangers!

    بالنسبة لي وجودها اجتماعيات، ومش بتعني حاجة في علاقتنا قوي..

    حسب Blogger Ghada, في 2/4/06 3:24 م  

  • السلام عليكم ورحمة الله وبركاته،
    ايه الكلام الظريف ده ، البنات المصريات تطوروا جدا -- للأسف لم أجد البلوج بتاعكم الا النهارده -- بس أنا مبسوطه أوي اني لقيت مصريات عربيات متفتحات بيكتبوا يعبروا على الانترنت من غير ما يتكلموا عن طلبات جواز ولا الأكل والشرب،
    على فكره بالنسبه لموضوع الدبله فأنا متزوجه وساعات بلبسها وساعات لأ - لأنها مش من الاسلام في شيء ولكن زيها زي أي خاتم اذا تحبي تلبسيه أوكيه مش عاوزه برضه أوكيه.

    وهو الدبله هنلبسها علشان فرحانين بالخطوبه، يبقه معظم ستات مصر يكونوا قلعوها بعد صدمة الجواز :)
    على العموم يا بناتيت يا أمامير - أحب أعرف اذا كان حد فيكم عنده وقت وانجليزي كويس ممكن أعلمه حاجات ظريفه في كيفيةالاستثمار اللي هو شغلي
    سلام يا أمرات

    دندن

    حسب Anonymous غير معرف, في 3/4/06 2:20 ص  

  • اتفق مع منال، مش مهم الدبلة خالص، مش شايفة لها لازمة، انا متجوزة برضو ومش لابسة دبلة ولا حاجة وماسمعتش على فكرة يا منال الكلمتين الحلوين الحمد لله عشان رد فعلي هايكون مش ظريف الحقيقة، وفعلا إللي يعرفني عارف اني متجوزة واللي مايعرفنيش مش مهم وحتى اللي يعرفني ومايعرفش اني متجوزة برضو مش مهم هايستفيد ايه يعني متجوزة ولا لأ؟
    بلاش دبلة واثبتي على رأيك.

    حسب Blogger الست نعامة, في 3/4/06 11:58 ص  

  • ياستي ده مجرد عرف مش لازم أبداً تلتزمي بيه ، علي العموم مادام هو موافق علي الوضع ده مافيش أي مشاكل ..

    علي فكرة انا بقول ((هو)) لأنه الطرف التاني ، يعني كنت هاقول ((هي)) لو كان هو اللي مش لابس دبلة ..

    فهمتي حاجة؟!

    يبقي نجحت :))

    حسب Blogger With Myself, في 4/4/06 2:42 ص  

  • لبس الدبلة شى طبيعى لكل بنت تلتزم بالطاعة وليس لاى بنت والسلام
    عموما الدبلة بتمثل بالنسبة لى شى كبير جدا

    حسب Blogger انا مصري وابن مصرى, في 7/4/06 1:45 م  

  • إيمان يا جميلة ... الدبلة اكتمال باحساس فرحة الخطوبة
    بالنسبة لينا .. كانت الدبلة حاجة مهمة جداً .. كان نفسي بقا نلبسها و نقول للناس كلها إننا أخيراً اتخطبنا

    و أنا لابساها باحس إني فخورة قوي بقصة حبي و بإني عرفت أوصل و احقق اللي أنا عايزه ... كنت عايزة الناس كلها تعرف أنو خلاص أنا لحبيبي و حبيبي إلي .. و محدش تاني ليه الحق إنه مجرد يفكر في حاجة تانية

    الموضوع مش إنك توري الناس إنك محجوزة لأن مش هو ده المهم .. و ده بصراحة ميهمنيش .. بس الدبلة بالنسبة لي مجرد اكتمال لشكل الخطوبة و الجواز ... و احساس جميل صغنن كده انه عادل دايماً بتاعي و أنا بتاعته و إننا حققنا الحلم .. و إننا إحنا الاتنين فرحانين قوي إننا نوصل إعلان ارتباطنا للعالم كله

    بس اللي عايزة أقوله إن من حقك لو مش فارق معاك موضوع الدبلة إنك ببساطة ماتلبسيهاش .. ده الأهم .. متعمليش حاجة و انت مش حاسة بيها لأنها كده هتفقد كل المعاني الي ممكن تكون فيها

    و مبروك يا عروسة بدبلة أو منغير :)

    حسب Blogger Dido's^^^, في 7/4/06 9:54 م  

  • يا ريت يا إيمان تتكلمي برده على "إصرار" البعض في إنها - اي الدبلة - تكون "سوليتير" وليست مصوغة من أي معدن آخر!!! وكأن السعادة تكمن في السوليتير!!!!!!!!!!

    حسب Blogger Aladdin, في 8/4/06 12:49 ص  

  • انا مصري وابن مصرى
    معلش .. ممكن حضرتك توضحلى موضوع الطاعة دة؟ طاعة مين بالظبط؟

    حسب Blogger Eman M, في 8/4/06 3:02 ص  

  • إيه الأفكار اللي خليتوني أفكر فيها دي؟ عاجبكم كده؟ دلوقتي أنا محتارة جداً...لإني عندي مشكلة أكبر من كده بكتير...وهو إني باحب الخواتم جداً وبازهق لما ألبس حاجة واحدة على طول :)

    متهيألي الحل إن الواحد يبقى عنده أكتر من دبلة علشان يلبس الدبلة المناسبة على الهدوم المناسبة في المناسبة المناسبة :P

    لأ نتكلم بجد...أنا متهيألي هابقى عاوزه البسها شوية وهييييه وكده وبعدين خلاص عادي مش أزمة بقى لابساها وإلا مش لابساها...بس أنا معاكي يا إيمان..اعملي اللي على مزاجك...دي صوابعك وده خطيبك :)))

    حسب Blogger حـدوتـة, في 9/4/06 12:51 م  

  • بالنسبة ليا الدبلة كان ليها معنى كبير
    يمكن لأني مكنتش متوقعة إني أتجوز علشان ظروف تخصني
    ويمكن لأني إفتقدت كل مظاهر الفرحة وكل أشكالها اللي دايما بتقترن بالخطوبة والجواز

    لا فستان ولا فرح ولا حتى حفلة في البيت ولا أهل
    الدبلة هي الحاجة الوحيدة اللي كا نليها علاقة بالحدث و بالتالي كانت هي بالنسبة ليا معنى الفرحة

    حسب Anonymous غير معرف, في 11/4/06 10:49 م  

  • الدبله 000 انا سمعت انه في حضاره من الحضارات القديمه تقريبا الهنود عملوا الموضوع ده لانهم كانوا مقتنعين انه هذا الاصبع الذي نلبس فيه الدبل 000 متصل بشريان الي القلب مباشره
    انا سمعت كده و لو في حد بيفهم فالتشريح او اي حاجه يقدر يقول الكلام ده صح و لا غلط يا ريت يقول لنا 00 بس الدبله من وجهه نظري انا كرجل شيء مهم اوي انه اعلان لكل الناس ان هناك واحده في حياتي الان تملك في داخلي شيء لطالما حاولت ان احافظ عليه انه بمثابه اعلان انني لست وحيد انها معي دائما حتي و ان كانت لا تظهر معي في كل مكان و لكنها تلبس هذه الدبله المصنوعه من الخاتم النفيس لتقول لكل الناس انها جزء مني و انني جزء منها

    حسب Blogger karakib, في 12/4/06 4:01 م  

  • هيا جت عالدبلة و بس؟
    طيب تفتكرى أهلى حيعملوا فيا ايه لما يعرفوا انى قررت أتجوز و بعدين حنبقى نوضب الشقة براحتنا فىالويك أندز لو فاضيين؟
    ليه يعنى لازم نضيع سنة على الأقل ولا حتى شهر نوضب فيه الشقة الى حبعيش فيها؟ طيب ما نجهزها و نزوقها و نروقها وحنا عايشين فيها؟
    أسئلة لو دوورنالها على أجوبة، مش حنلاقى ولو فضيانا نحاول حيجلنل صداع على الفاضى

    حسب Blogger Italian Rose ...,..@, في 27/4/06 10:40 ص  

  • الدبله دى مجرد عرف عندنا فى مجتمعنا...مجرد حاجة بتميز ما بين اللى متجوزين...و اللى لسه قاعدين فى بيوتهم...سواءرجاله او بنات...بتفرق كل واحد بيبصلها ازاى...انتى مثلا شايفة انها حتة حديدة ملهاش لازمة...ناس تانيه بتحس انها حاجة مهمة...انا عن نفسى هلبس دبله عادى...مش لانى بموت فى جمالها...بس لانى مش حسة ان فى مشكله اصلا من انى البسها...هما بس الناس حسه انك عملتى حاجة غريبة...لانك خالفتى العادى الماشى فى البلد...كأنك بقيتى تنزلى كل يوم الجامعة او الشغل بالشبشب بدل الجزمة...مش حاجة مهمة و مش فارقة اهم حاجة انك تعملى اللى يريحك

    حسب Blogger emy, في 2/5/06 2:22 ص  

  • الحقيقة أول مرة أشوف البلوج بتاعك وحبيت أضيف تعليق على الموضوع ده..
    أنا مجرد هأقول رأيى الشخصى طبعاً، لأن كل واحد عنده حرية يعمل اللى عايزه..أنا بالنسبة ليا الدبلة مهمة، فى أسباب كتير، بس كنت عايزة أقولك نقطة، لما حاجة بتتغير فى حياتك بيبقى شىء حلو إن التغيير ده يبقى له علامة، الارتباط تغيير مهم أوى فى حياتنا، ولما نربطه بحاجة زى الدبلة مش معنى كده اننا بنقلل من قيمته، حاجات كتير أوى فى حياتنا بنمثلها بحاجة مادية ولا تفقد قيمتها أبداً..لأن القيمة فى القلب والعقل، ولكن حاجة جميلة انك تشوفى التغيير ده بشكل مادى كمان، واحنا كبنات عموما بنحب نلبس خاتم أوسلسلة أو حلق..فحاجة طبيعية بالنسبة لنا، بالإضافة إلى معلومة ذكرت سابقاً انك بعد كده لما تنقليها فى الايد الشمال فى الجواز بيكون فيه شريان كمان من الصباع ده للقلب، فعموما حاجة جميلة، ولو ماكانتش جميلة ماكانتش فضلت لغاية دلوقتى وعلى مر الأجيال

    حسب Blogger honeybee0608, في 14/5/06 2:07 ص  

  • عامة هو لو الموضوع له علاقة بالطاعة يبقى هحرق محلات الذهب، طاعة إيه و هبل إيه، هو أنا هتخطب ولا هجيب أب جديد، والله حتى لو أبويا فكرة الطاعة دي مش داخلة دماغي، ما علينا،المهم مبروك على الخطوبة بلا دبل بلا بتاع

    حسب Blogger zeinab, في 18/6/06 2:39 ص  

  • Wow, i'm realy embarrassed everything in ur belog attractive.

    espacially the way u writ.

    ا معرفش بس مكنتش ابدا ُ اتخايل ان في بنت ممكن تفكر بالفكر ده.
    may be cause um new to the syper cultured environment.

    and regarding to the topic of
    دبله الخطوبه انا معاكي ميه في الميه
    من ناحيه انها تقليد اعمي ملوش اساس من العمليه.

    بس هوقلك حاجه ان لما كنت بخرج مع خاطبتي في الاول كنا من غير دبل, مش عايز اقولك اد ايه كنا بيتباصلنا بنظرات بيخه اوي من كل مكان نقعد فيه.
    especially that i was with a decent beard. it was really un polite even from her building watcher.

    think about it like so and give me ur comment back.

    حسب Anonymous Mohamed Fahmy, في 25/6/06 3:41 ص  

  • أنا كنت خاطب و دايما كنت بانسى البس الدبلة و بصراحة مابحبش البس دبلة فى ايدى و كانت خطيبتى دايما تزعل من الموضوع ده . و مش عارف لأمتى هانفضل نقلد بعض فى كل حاجة... يا جماعة كل واحد و له شخصيته و طباعه.

    حسب Anonymous أحمد فاروق, في 26/6/06 12:39 م  

  • Hmm I love the idea behind this website, very unique.
    »

    حسب Anonymous غير معرف, في 30/6/06 6:50 م  

  • Super color scheme, I like it! Keep up the good work. Thanks for sharing this wonderful site with us.
    »

    حسب Anonymous غير معرف, في 18/7/06 1:54 ص  

  • I find some information here.

    حسب Anonymous غير معرف, في 20/7/06 5:35 م  

  • انا درست مادة التشريح كلها ومش شوفت شريان بيوصل الاصبع ده بالذات للقلب
    الشريان الي بيجي للكف بيوزع دم على كل الصوابع
    يعني صوابعك زي بعض
    وبالتالي الفكرة دي مجرد خزعبلات
    بس اكيد مهمة كاجتماعيات ولحماية البنت من اي كلمة او بصة او سوء تفاهم
    مع انه مش هيفرق معاها طالما هي عارفة جواها انها مرتبطة بالانسان ده
    مش ضروري الكرة الارضية كلها تعرف وتباركلنا الخطوبة الميمونة
    ومش ضروري برده تبقى دبلة سوليتير
    فرضا كانت دبلة تنك حتى
    هتفرق ايه؟
    انا معاكي يا منال في انه الدبلة لبسها بيرجع لقناعة كل بنت ومعتقداتها
    ولو حصل واتخطبت لا سمح الله معتقدش اني هلبسها يعني
    لاني هحس انها صك ملكية او شعار زي بتاع المتاحف
    " ممنوع اللمس او الاقتراب او التصوير"
    او زي موقف العربيات
    " موقف خاص"
    ههههههههههههههه
    بلوجر جميل اوي وهايل وممتع ومفيد اوي
    انا هبقى ضيفة يومية عندكم
    تحياتي

    حسب Blogger الحياد لغة, في 10/9/06 10:28 ص  

  • الدبلة والشابكة عاملة زى كلبشات رجال الشرطة , لابسة شابكة يعنى مقبوض عليا بتهمة مجهولة يعلمها الرجل فقط ودمتم سالمين

    حسب Anonymous غير معرف, في 28/10/06 4:51 م  

  • اية الكلام العبيط دة مجتمع واجبار وبطيخ
    الدبل هي التزام بين شخصين بشئ واحد بيعملوة سوا وشيئ جميل بيمثل رابط بينهم بيبتدي في الخطوبة وبيكمل بية مشوارهم للنهاية
    بلاش تكبير المواضيع وافلام انا حرة والمجتمع بيفرض عليا تقاليد العملية مش ناقصة افلام وتضخيم كل شئ

    حسب Blogger رجل الشتاء الأخير, في 23/11/06 1:49 م  

  • يا شباب الدبلة مهمة طبعا مش لازم يكون الواحد معتقد بالخرافات المرتبطة بيها علشان يلبسها لكن مدلولها الاجتماعي قوي
    انا بأة عندي سؤال صعب شوية لما البنت تخلع خاتم المحبس وتفضل لابسة الدبلة يبقي ليه مع العلم ان كان في مشاكل بنها وبين خطيبها هل معني كده انهم حايفسخو الخطوبة؟

    حسب Anonymous Ahmed F, في 4/12/06 1:46 ص  

  • اولا مبروك يا ايمان بالنسبة لية الموضوع بيفرق كتير يعنى انا لبسة دبلة وشيفة انها مهمة عشان الناس بتعرف انك مخطوبة فى شخص شغلك وبتختلف نظرتهم ليكى وانتى معاة ودة يخلينى اقوللك انى حكمة على خطيبى انة يلبسها رغم انة متدين وبيقول انة مشهيلبسها بعد الزواج بس دلوقتى عشان خطرى

    حسب Anonymous غير معرف, في 1/2/07 12:16 ص  

  • Where did you find it? Interesting read Reasons for hair loss

    حسب Anonymous غير معرف, في 15/2/07 1:15 م  

  • انا كل أهمية الدبلة بالنسبال انها اعلان للناس ان ف علاقة بيننا لو ماشيين مع بعض مثلا... ولو كنت لوحدى فهيا فعلا فرامل لأى واحد.. بحس انها بتصد اللى واحد نوعا ما من غير ماتضطرى تتكلم وتقلبى وشك و نتخانق...الخ الخ الخ
    عموما انا حاولت وبحاول اثور عل حاجات كتير مش شايفاها مقنعة
    مثلا نفس افهم ايه لازمة الشبكة فى تاريخ البشرية.. أنا واحدة مش بحب الدهب.. وما احبش خطيب يجيبل هدية لمجرد انه لازم يجيبها او ان احنا مش اقل من فلان وعلان... وعندى يشيل مبلغ الشبكة ده ويهادين بيه طول عمر على فترات بحاجات صغيرة هاتكون احب ليا.. معرفش شايفاها مغالاة... بس اول ماقلت كده الدنيا قامت وما قعدتش...
    انا برده من انصار ان اجهز الشقة عل مهلى وبراحتى وانا قاعدة فيها ولا حد يصربعنى ولا ازنق نفسى لاى سبب.. وحتى علشان ما اتكروتش.. بس بصراحة لسة بدرى على ما اجهر بالمطلب ده وده بق مش ممكن حد يناقشنى فيه

    حسب Anonymous غير معرف, في 23/2/07 4:57 ص  

  • اخي في الله انتي على حق في موضوع الدبله فهي عاده نصرانيه وتسمى بالجمنيوت او نصف الاككليل
    وقال صلى الله عليه وسلم من تشبه بقوم فهو منهم
    صدق رسول الله صلى الله عليه وسلم
    فلو خلعتها معناها انك لم تعودي مخطوبه هذا كلام ليس له اصل من الصحه
    والله اعلى واعلم

    حسب Anonymous غير معرف, في 27/2/07 1:04 ص  

  • Excellent, love it! » » »

    حسب Anonymous غير معرف, في 5/3/07 6:29 ص  

  • سؤال:
    ما هو حكم خاتم الخطوبة أو الزواج للرجال ؟ إذا كان جائز فهل يجوز أن يكون من أي معدن غير الذهب ؟ ما هي المعادن التي لا يجوز للرجال استعمالها غير الذهب ؟.

    الجواب:
    الحمد لله

    " أما لبس الذهب للرجل خاتماًأو غيره فلا يجوز بحال من الأحوال ، لأن النبي صلى الله عليه وسلم حرّم الذهب على ذكور هذه الأمة ، ورأى رجلاً في يده خاتم من ذهب فنزعه ـ عليه الصلاة والسلام ـ من يده ، وقال : ( يعمد أحدكم إلى جمرة من نار فيضعها في يده ) ، رواه مسلم ( اللباس والزينة/3897 ) ، فلا يجوز للذكر المسلم أن يلبس خاتم الذهب ، وأما الخاتم من غير الذهب من الفضة أو غيرها من أنواع المعادن فيجوز للرجل أن يلبسه ولو كان من المعادن الثمينة .

    وأما ( الدِّبْلَة ) فهذه ليست من عوائد المسلمين ، وهي التي تلبس لمناسبة الزواج ، وإذا كان يعتقد فيها أنها تسبب المحبّة بين الزوجين ، وأن خلعها وعدم لبسها يؤثر على العلاقة الزوجية ، فهذا يُعتبر من الشرك ، ويدخل في الاعتقاد الجاهلي , وبناء على ما تقدّم فلا يجوز لبس الدبلة بحال

    أولاً : لأنها تقليد لمن لا خير فيهم ، وهي عادة وفدت على المسلمين من غير المسلمين .

    وثانياً : أنها إذا كان يصحبها اعتقاد أنها تؤثر على العلاقة الزوجية فهذا يدخل في الشرك ولا حول ولا قوّة إلا بالله . مستفاد من فتوى الشيخ صالح الفوزان .

    وسئل الشيخ ابن عثيمين عن حكم لبس دبلة الخطوبة فقال : دبلة الخطوبة عبارة عن خاتم ، والخاتم في الأصل ليس فيه شيء إلا أن يصحبه اعتقاد كما يفعله بعض الناس يكتب اسمه في الخاتم الذي يعطيه مخطوبته ، وتكتب اسمها في الخاتم الذي تعطيه إياه زعماً منهما أن ذلك يوجب الارتباط بين الزوجين ، ففي هذه الحال تكون هذه الدبلة محرّمة ، لأنها تعلّق بما لا أصل له شرعاً ولا حسّاً ، كذلك أيضاً لا يجوز في هذا الخاتم أن يتولى الخاطب إلباسه مخطوبته ، لأنها لم تكن زوجه بعد ، فهي أجنبيّة عنه ، إذ لا تكون زوجة إلا بعد العقد .

    انظر الفتاوى الجامعة للمرأة المسلمة ج/ 3 ص/914-915

    س. أ. ب. من جدة أيضاً تسأل عن وضع الدبلة عند الخطوبة حتى يعرف الشابة أو الشابة بأنهما مخطوبان وكذلك بعد الزواج، وهل كان الرسول صلى الله عليه وسلم يلبس خاتماً في يده كدبلة كما سمعت من البعض نرجو الإفادة جزيتم خيراً؟
    الجواب

    الشيخ(ابن عثيمين): الدبلة لباسهاعلى قسمين
    القسم الأول: أن يكون مصحوباً بعقيدة مثل أن يعتقد كل من الزوجين أن بقاء الدبلة في أصبعه سبباً لدوام الزوجية بينهما ومن هنا تجد الرجل يكتب اسم زوجته في الدبلة التي يلبسها والمرأة تكتب اسم زوجها في الدبلة التي تلبسها وهذا القسم لا شك أنه حرام ولا يجوز لأنه نوع من التولة وهي نوع من الشرك الأصغر وذلك أن هذا الزوج أو الزوجة اعتقدا في أمر من الأمور إنه سبب بدون دليل شرعي ولا واقع حسي وكل من اثبت سبباً من الأسباب بدون دليل شرعي ولا واقع حسي فقد فعل شركاً أصغر لأنه جعل ما لم بجعله الله سبباً سبب،
    أما القسم الثاني: كأن يلبس الدبلة للإشعار بأنه خاطب أو بأنها مخطوبة أو بأنه قد دخل بزوجته وقد دخل بها زوجها وهذا عندي محل توقف لأن بعض أهل العلم قال إن هذه العادة مأخوذة عن النصارى وأن أصلها من شعارهم، ولا شك إن الاحتياط للمرء المسلم البعد عنها، والتجنب لها لأن لا يقع في قلبه أنه تابع لهؤلاء النصارى الذين سنوها أولاً فيهلك، وأما ما يرسل إلى المخطوبة عند الخطبة من أنواع الحلي فإن هذا لا بأس به لأنه عبارة عن هدية يقصد بها تحقيق رغبة الزوج لمخطوبته، نعم.

    ـــــــــــــــــــــــــــــــــــــــــــــــــــــ

    و من فتاوي ( ابن جبرين )
    إلباس الخاطب لخطيبته في يدها اليمنى خاتما من ذهب يسمى " الدبلة " نقش عليه اسمه، فإذا دخل الزوج بها ينقل الخاتم إلى اليد اليسرى، وهذه من عادات النصارى، وقد سئل سماحة الشيخ عبد العزيز بن باز عن الدبلة فقال: لا أصل لها في الشرع.

    فهي بهذه العقيدة الفاسدة نوع من الشرك، وبغير هذه العقيدة تشبه بغير المسلمين؛ لأن هذه الدبلة متلقاة من النصارى، وعلى هذا فالواجب على المؤمن أن يبتعد عن كل شيء يخل بدينه.

    حسب Blogger Dr. Ahmad, في 27/8/07 10:36 م  

  • بالنسبةلياالدبلةحاجةتانيةيعني بحس انهاحتةمنه وغيركدةبحس بوجودةمعاياودي حاجة تانية بالنسبةليا

    حسب Anonymous غير معرف, في 20/2/08 10:46 م  

  • طب سؤال انت هتخسري ايه لما تلبسيها ؟؟؟يعني ايه المشكلة ؟؟لو المشكلة مديه مثلا فانكم تجيبوا دبلة دلوقتي نقول ما فيش مشاكل,,,بس ليه نتهم الناس بنفس الحاجه اللي احنا بنعملها ,,بمعني ان ما فيش مشاكل لو لبستيها طالما الموضوع لا يخالف لا شرع و لا دين و لا داعي باننا نكون زي الشريك المخالف لمجرد الظهور يعني الفكرة سهله اصلا
    اما بالنسبه لاهميتها فهي مش بالاهميه الكبيرة اوي ,,و لو علي محجوزه ,,فبصراحه هي فكرة لان الناس الغلسه كتير يعني نوع من انواع ابعد عني لاجبلك اللي يعورك
    وربنا يسهل لكل البنات

    حسب Blogger صوت فيروز, في 9/3/08 3:59 م  

  • أنها ليست مجرد رغبة فى الحب
    أنه أحتياج و أشتياق لتلك المشاعر الدافئة
    أنه خوف من جفاف المشاعر و تحجر القلب
    خوف من الوحدة و النسيان
    هذه ليست مجرد دموع حزينه و إنما لوعة
    لوعة من قسوة الأيام
    من حزن لا مفر منه
    وهذه ... ليست أمطار
    أنها دفق من المشاعر فى ليلة بلا قمر
    ليس خوف من التقدم فى العمر بلا أرتباط
    أنه ... ليس خوف من الفشل و نظرات التساؤل
    و إنما أحتياج للمشاركة و العطاء
    أحتياج لذلك الشعور بالأمتلاء و الأهتمام
    هذا ... أنه ليس سؤال و إنما رجاء
    رجاء يصرخ من وراء النظرات الصامته
    متى؟ متى يكون هذا؟
    كيف؟ كيف سيكون الشتاء القادم؟
    بارد؟ جاف؟ وحيد؟
    أم ممطر ولكن دافئ
    هذا الشعور ... أنه ليس سعياً نحو الكمال و النجاح
    و إنما سعياً وراء الحياه
    سؤال يلح ...
    كيف تستمر الحياه مع هذا الخواء؟
    و كيف تسمو المشاعر بلا حب؟

    مرسلة بواسطة Flying Angel في 01:31 ص 0 التعليقات
    الاشتراك في: الرسائل (Atom)

    حسب Blogger Flying Angel, في 3/4/08 4:33 م  

  • السلام عليكم هو موضوع كويس اوي ياجماعة لو نيجي انحللو من الناحية الشرعية الدبلة مش لازمة بل تعتبر تشبه بالنصارى الي هي عندوهم لازمة و ضرورية .so من الناحية دية ماتلبسيش الدبلة.
    بس لو لو نشوفها من الناحية الاجتماعية هي اكيد لازمة لان الناس لما يشوفو واحدة مخطوبة ومش لابسة دبلة حايقولو ان البنت دي مش كويسة وانها عايزة تلعب على الحبلين يعني كده و كده والفكر ده هو اللي فرض لبس الدبلة.....والسلام خير الكلام..

    حسب Anonymous غير معرف, في 17/7/08 5:20 م  

  • انا عن نفسي مقدرش استغني عن الدبله
    لان الشعب المصري مبيسكتوش بيتكلموا علي اي حاجه لو ماشيه مع خاطيبك في الشارع هيعرفوا منين انه خطيبك
    انا كنت بقول الاول كلام الناس مبيهمنيش انا حره اعمل اللي شيفاه صح بس اتجرحت كتير وحصل لي مشاكل
    وغير كده الدبله رمز الخطوبه
    الشباب يعرفوا انك مخطوبه مش يكون خطيبك عندك في البيت وواحد جاي هوه واهله علشان يتقدمولك
    انا مش ببص للدبله علي اساس انها شكليات ولازم تحصل بس ببصلها علي انها حاجة من خطيبي بتلازمني في اي مكان

    حسب Anonymous الدلوعه, في 30/8/09 5:07 ص  

  • الدبله مهمه عشان صورتك امام الناس عشان مايفهموكي غلط لااكثر ولااقل هيه مابتزودحبك ولابتذكرك بخطيبك اواي شي من هذا الكلام لان حتى لومافي دبله هوي دائمابقلبك وشاغل كل تفكيرك

    حسب Anonymous غير معرف, في 10/4/10 2:34 م  

  • الدبله مهمه عشان صورتك امام الناس عشان مايفهموكي غلط لااكثر ولااقل هيه مابتزودحبك ولابتذكرك بخطيبك اواي شي من هذا الكلام لان حتى لومافي دبله هوي دائمابقلبك وشاغل كل تفكيرك

    حسب Anonymous غير معرف, في 10/4/10 2:34 م  

  • السلام عليكم يا بنات ...
    الأصل في الإنسان المسلم عند ما يلتبس عليه أمر ويكون محل خلاف أن ينزله ويعرضه على الشرع أولاً حتى يتبين ويعلم حقيقته.....
    أما الناس وكلام الناس فلا يبالي المسلم إذا ما أطاع الله واتبع هداه أن يضره من كلام الناس شيء...
    ولعل الدكتور أحمد قد بين في تعليقه على حكم لبس الدبله للشيخ ابن عثيمين رحمه الله...
    ودمتم بخير

    حسب Anonymous غير معرف, في 26/11/10 7:25 م  

  • انا عدت عليا موضوع خطوبه ده بس عدى عليا فيه حب حيساتى كلها كنت اسعد انسانه يوم خطوبتى كنت حاسه انى مش على لارض كان خطيبى ده فى عيوب كتيره لكن كنت بتهون فيها لانى كنت بحبه موت ولاحظت انى من كتر ماتهونت فى عيوبه لقتنى بتهاون عن حاجات كتير بس هو صحيح واحد ممكن يمثل لدرجة البراعه انا ببقه عارفه انه بيكدب بس لما بسمع صوته بصدقه وبجى على نفسى مش عارفه ليه حاجه ملهاش وصغف تقدر تقول انى ضعيفه قدامه بس دلوقتى انا بعدى مرحل توهان كل عرسان الى بيتقدموا ليا بيحبطونى اكتر لانهم مش منسبين ولا انى مش قادره انسى انى بحب انسان خانى ومقدرش يحمينى مش عارفه ...............

    حسب Anonymous غير معرف, في 19/8/12 11:28 م  

  • حسب Blogger عرب قيرلز, في 7/1/13 9:51 ص  

إرسال تعليق

الاشتراك في تعليقات الرسالة [Atom]



<< الصفحة الرئيسية