كلام بنات

الثلاثاء، يوليو 11، 2006

بيقولوا كلام بنات

كلام بنات.. كلام بنات.. كلام بنات
وهو ايه كلام البنات؟ ان البنت تقول على فلان شكله يهوس؟ ولا انها تناقش الموضة مع خلق ربنا.. ولا انها تشوف الميك أب وتسريحة الشعر بتاعة فلانة وترتانة ازاى؟؟ ولا تفتكروا كلام البنات النم على غيرها.. ولا ايه رايكم فى كلام البنات المعيطة؟
ايه رأيكم فى البنات اللى من غلبها خلص كلامها عشان كل ذنبها انها بنت..

بتوجع.. ولا أقول كمان؟

أقول كمان..

هى حدوتة ملتوتة لواحدة بنت.. عندها حفنة سنين يا دوب شيلاهم فى كفها .. من صغرها وكان عندها أحلام.. حلمت مرة بالفارس المغوار.. وفاقت لما عرفت ان مافيش فى زمانها فرسان.. وحلمت زمان ببيت صغير.. وفاقت لما عرفت ان تمن البيوت غالى .. وعليها وعلى ابن الحلال يكافحوا يجيبوا شقة محندقة تلمهم... كان عندها حلم تلاقى فيه نفسها.. ولقت الدنيا دوامة كبييرة.. تاخدها لحت ولتحت تانى لحد ما تتخنق.. يااااه.. حلمت كمان بحضن يسمعها لما تتمنى حد يسمعها.. لكنها لقيته قدمها جامد جاحد.. ظالم وقاسى.. وخلاها تبات ليلها معيطة

فتحت عينيها وسط سنينها ودورت على كلامها.. لقيته وسط أحلامها اتسرسب من غير ما تحس

سلاماتى

الجمعة، يوليو 07، 2006

زوجة أحبها أم أرتاح معها؟

زوج: انا مراتى مش أكتر واحدة حبيتها، بس هى أكتر واحدة بارتاح معاها

كلمات واقعية ستجدها عند العديد من الرجال ( لن أعمم و لكنها نسبة ليست بقليلة)، فنادراً ما يتزوج الرجل من المرأة التى أحبها و تمنى الزواج منها، و لكن مع دوران الأيام يتزوج من امرأة يرى إنها ستشاركه حياته و يحبها أيضاً .. و لكن مع الفارق!
يملأ حياتها بكلام الحب و العشق، و لكنه يعرف فى قرارة نفسه أنها ليست "حب عمره"، و لكنه "مرتاح معاها".

ما معنى "مرتاح معاها"؟ هل لأنها مسؤلة عن أكله و ملبسه و خدماته و موائمة مع طباع شخصيته؟
هل تتخيلون معى موقف الزوجة؟ تعتقد أنها حياته (حتى لو أنها تعلم بعلاقاته السابقة) .. بينما الحقيقة شئ آخر
هل تفكر كل زوجة فى هذا الإحتمال؟ مسكينة .. أو لا أعرف بما أوصفها.


(حتى لا أُتهم بالتحيز العنصرى تجاه المرأة .. قد تتبادل الأدوار فى ما سبق ذكره )